Me treng fleire hender i sommarsesongen!
Det går fort mot vår - og med det starten på ein ny kjekk "sommarsesong" med mange gjester frå fjern og nær.
Me treng difor fleire arbeidsvillige og serviceinnstilte medarbeidarar på laget på Store Ringheim!
SERVITØR - restaurant & selskap
Me treng fleire servitørar til Restaurant Flor'n og våre selskapslokale i tidsrommet mai til september.
Me har ulike stillingsstorleikar, då me har behov for fleire hender på ulike tidspunkt gjennom ein sommarsesong med restaurantgjester, grupper på lunsj, konfirmasjonar, brudlaupsfeiringar og andre selskap/grupper.
Me ser etter deg som er serviceinnstilt, likar å selja, er arbeidssam og pliktoppfyllande og at du likar å arbeida med menneske i eit til tider hektisk miljø. Det er ein fordel om du har noko erfaring frå servitøryrket, men det viktigaste er at du har ei interesse av å arbeida i servicebransjen - og er villig til å læra.
Me har ikkje kundar, me har gjester. Alle våre gjester skal kjenna seg som heime hjå oss - og behandlast som din personlege gjest.
Språk er difor eit viktig moment i stillinga som servitør. Du bør kunna forstå, og aller helst gjera deg forstått på norsk, i tillegg til å beherska det engelske språket. Andre språk er sjølvsagt eit pluss, men ikkje noko krav.
FRUKOST OG RESEPSJON
Me ser etter ein morgonfrisk og smilande person som kan senda gjestene våre vidare på ferda med god mat i magen og eit smil om munnen.
Stillinga omfattar å laga frukosten, setja opp og vedlikehalda buffeten, rydda vekk og gjera klart for frukosten dagen etter samt kunna sjekka ut gjester som reiser før resepsjonspersonale kjem på plass. Etter frukosten er rydda vekk vert det førefallande arbeid med vask, evnt hjelpa til med preparering på kjøkenet og servering av lunsjgrupper.
Hugs, me har ikkje kundar, me har gjester. Alle gjestene våre skal kjenna seg som heime hjå oss - og handsamast som din eigen gjest.
Du må kunna kommunisera greit på Norsk og Engelsk. Kjennskap til Fransk og Spansk vil vera ein føremun men ikkje noko krav.
Du må ha grunnkunnskapar om matlaging, me vil gje god opplæring i korleis me lagar frukosten vår. Du må lika å småprata med folk samt ha den evna til å «sjå» alle, også dei som ikkje gjer så mykje av seg.
Det hadde sjølvsagt vore fint om du bur på Voss men for de som ikkje er så heldige vil me hjelpa til med å finna husvære for sesongen.
REINHALDAR - hotellrom
Me treng hjelp til reinhald av dei 15 hotellromma våre i tidsrommet mai til september.
Me ser etter deg som er serviceinnstilt, er arbeidssam og pliktoppfyllande, likar å arbeida med menneske - og ikkje minst ha det reint og ryddig rundt deg!
Arbeidet vert først og fremst reinhald av hotellromma i Gardshuset og Reiskapshuset. I tillegg kjem vask av golv i løo når det er tid til det samt anna førefallande arbeid innan reingjering.
Hugs, me har ikkje kundar, me har gjester. Alle gjestene våre skal kjenna seg som heime hjå oss - og handsamast som din eigen gjest.
Kva som er morsmålet ditt er ikkje så viktig, så lenge du kan kommunisera greitt på norsk eller engelsk med gjestene våre (og oss). Det aller viktigaste er at du er interessert i å gjera ein god jobb og at du er serviceinnstilt.
Me set ekstra stor pris på om du er busett i bygda og at du er litt fleksibel. Me ser både etter deg som ynskjer å arbeida heile sommarsesongen, eller berre deler av den.
Meir informasjon om stillingane får du ved å kontakta Svein, fyrst og fremst på e-post. Du kan og ringa resepsjonen og spyrja etter Svein. Om du er ein av dei som kan passa inn i Store Ringheim familien, så avtalar me ein samtale snarast.
Store Ringheim er eit lite hotell og ein middels stor restaurant på Voss og Vestlandet. Store Ringheim Hotell og Restaurant AS er staden for dei gode opplevingane - og me er stolt medlem av De Historiske Hoteller og Spisesteder.
HOTELLET
Vårt vesle boutiquehotell har 15 unike & særprega rom fordelt på 2 bygningar, Gardshuset og Reiskapshuset. Hotellromma er komfortable, romslege og fint restaurerte. Dei er av ulik storleik og alle romma har moderne flislagde baderom med dusj. Her er gode sittegrupper, fjernsyn, vasskokar og det du treng for ei god overnatting. Me har sjølvsagt trådlaust nett i alle våre bygningar.
RESTAURANT FLOR'N
Her byr me på jordnære & rustikke måltid, laga av det beste av lokale & ureiste råvarer - med fokus på den gode smaken. Restaurant Flor'n er vår a la carte restaurant, med ei tilhøyrande hagestove ute på terrassen. I tillegg nyttar me 2 andre lokale, Smalaflor'n og Tømmerstovo, til grupper/selskap/arrangement. Restauranten er kjent for å servera smakfulle måltid med særs god kvalitet - og me har gode tilbakemeldingar på bl.a. Tripadvisor. All mat er laga frå botn av, hovudsakleg frå lokal og ureist råvarer. Store Ringheim har eit eige grovkjøken for nedskjering av heile dyr og til produksjon av vår eigen gardsmat. Me har og ein hage rett utanfor døra med bær, urter, blomar og grønsaker. Vertskapet/eigarane er sjølv ute i skogen og på fjellet for å plukka bær, sopp m.m. til bruk i restaurantdrifta.
Me held alltid augene opne etter dyktige menneske som ynskjer å arbeida i servicebransjen - og som kan passa inn hjå oss på Store Ringheim. Dette gjeld faste stillingar i ulike storleikar, ekstrahjelp over ein periode eller sesongarbeide.
Me ser etter deg som er serviceinnstilt, er arbeidssam og likar å arbeida med menneske. Me har ikkje kundar, me har gjester. På Store Ringheim skal alle våre gjester skal kjenna seg som heime og behandlast som din personlege gjest. Difor er og språk viktig. Du bør kunna forstå, og aller helst gjera deg forstått på norsk, i tillegg til å beherska det engelske språket. Andre språk er sjølvsagt eit pluss, men ikkje noko krav.
Send oss gjerne ein open søknad der du skriv litt om deg sjølv og kva du kan bidra med. Legg og ved ein oppdatert CV.
Spørsmål? Kontakt oss